ရန်ကုန်ဓာတ်ပုံပွဲတော်ကနေ ရလဒ်ကောင်းတွေ ရရှိခဲ့
http://www.myanmar.mmtimes.com/2012/timeout/555/tmout03.html
မေစန္ဒီ-အတွဲ ၂၈ ၊ အမှတ် ၅၅၅ ( ၃ - ၉ ၊ ၂ ၊ ၂၀၁၂)
ပြင်သစ်ယဉ်ကျေးမှုဌာနက ဦးစီး ကျင်းပတဲ့ စတုတ္ထအကြိမ်မြောက် Yangon Photo Festival ဖွင့်ပွဲ အခမ်းအနားနဲ့ ဆုရဓာတ်ပုံတွေ အတွက် ဆုပေးပွဲအခမ်းအနားကို ဇန်န၀ါရီလ ၂၈ ရက်နေ့က ဌာနမြက်ခင်းပြင်မှာ ကျင်းပခဲ့ရာ ပထမဆုကို ဦးမျိုးသိန်း၊ ဒုတိယဆုကို မဆိုင်းမိုင်နဲ့ တတိယဆုကို Ms. Amelie Chai Shwe တို့ရရှိခဲ့ပြီး တခြားဆုတွေကိုတော့ မဖြူဖြူသင်း၊ မစန္ဒြာမြင့်၊ ကိုထွန်းထွန်းအေး၊ ကိုဖြိုးဟန်၊ ကိုမျိုးကျော်လွင်၊ မမူမူ၊ ကိုမင်းဇေယျာနဲ့ ပီကေတို့က ရရှိခဲ့ပါတယ်။
ဒီဆုတွေကို ဒေါ်အောင်ဆန်းစုကြည်၊ ပြင်သစ်သံအမတ်ကြီး Mr. Thierry Mathou ၊ ပြင်သစ်ယဉ်ကျေးမှုဌာနမှ ဒါရိုက်တာ Mr. Febrice Etienne ၊ ဓာတ်ပုံပညာရှင် Christophe Loviny နဲ့ အခြားနိုင်ငံတကာဓာတ်ပုံပညာရှင်တွေ စုပေါင်းပြီး အကဲဖြတ်ရွေးချယ် ခဲ့ကြတာ ဖြစ်ပါတယ်။
အုတ်သဲကျောက်လုပ်ငန်းက၊နေ့စား အလုပ်သမားကလေးငယ်တစ်ဦးရဲ့ဘ၀ကို မြင်ရသူတွေ ကရုဏာစိတ်၊ ကိုယ်ချင်း စာစိတ်ဖြစ် အောင် ရိုက်ကူးပြထားတဲ့ ပထမဆုရှင် ဓာတ်ပုံဦးမျိုးသိန်းက သူရဲ့ ဒီကလေးအပေါ်ထားရှိတဲ့ မှန်ကန်တဲ့ စေတနာမေတ္တာကြောင့် အခုလို ပထမဆုကို ရခဲ့တာပါလို့ ဆုလက်ခံယူအပြီးမှာ မြန်မာတိုင်း(မ်)ကို ပြောပါတယ်။
"ကျွန်တော့ သူငယ်ချင်းတစ်ယောက်ရဲ့ အုတ်သဲကျောက်လုပ်ငန်းကို သွားတိုင်း အဲဒီဝန်းကျင်ထဲမှာနေတဲ့ ကလေးတွေကိုမြင်တိုင်း စိတ်ထဲမကောင်းဘူး။သူတို့အတွက် တစ်ခုခုလုပ်ပေးချင်တယ်။ ဒါပေမယ့် သူတို့ရေခဲချောင်းစားချင်ရင် ရေခဲချောင်းဖိုးပေးတာကလွဲလို့ ဘာမှ ပိုမလုပ်ပေးနိုင်ဘူး။ "နောက်တော့ ကျွန်တော့အလုပ်က ဒီမှာ ဓာတ်ပုံသင်တန်းလာတက်ခိုင်းတဲ့ အခါ အဲဒီကောင်မလေးကို သွားရိုက်ပြီးတော့ ပြလိုက်တာပါ။ ကောင်မလေးက ဆင်းရဲတယ်။ ဒါပေမယ့် သူ့ရဲ့ဘ၀ကို သူပျော်တယ်။ သူဘာကြောင့်ပျော်သလဲ ဆိုတာကို ကျွန်တော် အင်တာဗျူးတယ်။ပြီးတော့ ကျွန်တော့်ကိုသီချင်းဆိုပြတယ်။ ကျွန်တော့စိတ်ထဲမှာ နည်းနည်းတော့ သံသယ ဖြစ်တယ်။ ဆင်းလည်းဆင်းရဲတယ်။ ဘာလို့ပျော်နေလဲ။ ဒါက လွတ်လပ်ခြင်းပဲ"လို့ ကုလသမဂ္ဂ ကလေးများရန်ပုံငွေအဖွဲ့မှာ အလုပ် လုပ်ကိုင်တဲ့ ဦးမျိုးသိန်းက ပြောပါတယ်။
ပြင်သစ်ယဉ်ကျေးမှုဌာနမှဒါရိုက်တာ Mr. Febrice Etienneက ဦးမျိုးသိန်းရဲ့ ဖိုတိုအက်ဆေးဟာ ကလေးတစ်ယောက်ရဲ့ အင်တာဗျူး နဲ့ စထားပြီး သူရဲ့သီချင်း ငြီးသံနဲ့ အဆုံးသတ်လိုက်တဲ့ တင်ဆက်မှုဟာ ဆုပေးပွဲတက်ရောက်လာကြတဲ့ ပရိသတ်တွေအားလုံးရဲ့ ရင်ထဲကို တမြေ့မြေ့နဲ့ ကျန်ရစ်ခဲ့စေတာကြောင့် ဒိုင်အဖွဲ့ရဲ့ တညီတညွတ်တည်း ဆုံးဖြတ်ချက်နဲ့ ပထမဆုအဖြစ် ရွေးချယ်ခဲ့တယ် လို့ ပြောပြပါတယ်။
၂၀၀၉ ခုနှစ်ကစပြီး ပြင်သစ်ယဉ်ကျေးမှုဌာနရဲ့ပင်တိုင်ဓာတ်ပုံနည်းပြအဖြစ် သင်ကြားပို့ချပေးတဲ့ ဓာတ်ပုံပညာရှင် Christophe Loviny ကလည်းပွဲအတွက် နေ့ရောညပါ ပင်ပန်းခဲ့ရပေမယ့် နောက် ဆုံးမှာတော့ အင်မတန်အင်အားပြင်းထန်တဲ့ ရလဒ်ကောင်းတွေ ရလာ ခဲ့တယ် လို့ ပြောပါတယ်။
"သူတို့ပေးချင်တဲ့ မက်ဆေ့ခ်ျက အင်မတန်ကို ပြင်းပါတယ်။ ကျွန်တော် ကိုယ်တိုင်ပဲ တချို့ပုံတွေကိုကြည့်ပြီး ဂရုဏာသက်မိပါတယ်။ နည်းပညာပိုင်းကတော့ ဘယ်သူမဆို ပြီးရင်ရသွား မှာပဲ။ အဓိကကိုယ်ပြတဲ့ အကြောင်း အရာက လူတွေရဲ့နှလုံးသားထဲမှာ စွဲကျန် ခဲ့ဖို့ပဲ"လို့ သူက ပြောပါတယ်။
ပရိသတ်တွေကို နှုတ်ဆက်စကား ဆိုခဲ့တဲ့ ဒေါ်အောင်ဆန်းစုကြည် ကလည်း ... "အင်မတန် ပျော်စရာကောင်းတဲ့ အတွေ့ အကြုံ တစ်ခုပါ။ အရမ်းကိုလှတဲ့ ဖိုတို အက်ဆေးတွေကို မြင်တွေ့ရသလို၊ လူငယ်တွေဆီမှာ ပါရမီဘယ်လောက် ရှိလဲဆိုတာလည်း သိလိုက် ရပါတယ်။ ကျွန်မ ဒီနေ့အကဲဖြတ်တစ်ယောက်အဖြစ် ပါဝင်ခွင့်ရတဲ့အတွက် အင်မတန်ဝမ်းသာဂုဏ်ယူမိပါတယ်။ ကျွန်မတို့နိုင်ငံရဲ့ ဘ၀ကိုပုံဖော်နိုင်မယ့် လူငယ်တွေ ပါဝင်နိုင်တဲ့ ဒီလိုပွဲမျိုး နောင်မှာ ဒီထက်ပိုပြီးကျင်းပနိုင်ဖို့အတွက် မျှော်လင့်ပါတယ်" လို့ ပြော သွားပါတယ်။
No comments:
Post a Comment